पर्सा निर्वाचन क्षेत्र नम्बर–३ मा फागुन २१ गते हुन गइरहेको प्रतिनिधिसभा निर्वाचन नजिकिँदै जाँदा चुनावी गतिविधि तीव्र बन्दै गएको छ। यसै सन्दर्भमा नेकपा एमालेका युवा उम्मेदवार रूपेश पाण्डेले घरदैलो अभियानलाई मुख्य रणनीति बनाउँदै मतदातासँग प्रत्यक्ष भेटघाट र संवादलाई प्राथमिकता दिएका छन्।
उम्मेदवारी दर्तापछि पाण्डे टोल–टोल र बस्ती–बस्ती पुगेर स्थानीयसँग खुला संवादमा जुटिरहेका छन्। जनताको दैनिक जीवनसँग जोडिएका समस्या, आवश्यकता र अपेक्षा सुन्दै उनी विकासका स्पष्ट खाका प्रस्तुत गरिरहेका छन्, जसले चुनावी वातावरणलाई थप सक्रिय बनाएको छ।
स्थानीय पूर्वाधार सुधार, युवालाई रोजगारीका अवसर सिर्जना, आर्थिक गतिविधि विस्तार र स्वरोजगार प्रवर्द्धनलाई पाण्डेले आफ्नो मुख्य एजेन्डा बनाएका छन्। शिक्षा र स्वास्थ्य सेवाको पहुँच सुधारदेखि साना तथा मझौला व्यवसायलाई प्रोत्साहन गर्ने योजनासम्म उनले घरदैलो अभियानका क्रममा स्पष्ट धारणा राख्दै आएका छन्।
व्यवसायिक अनुभव र संगठनात्मक दक्षताका कारण पाण्डे व्यवहारिक सोच र कार्यान्वयनमा विश्वास गर्ने नेताका रूपमा चिनिन थालेका छन्। उनीसँगको छलफलपछि धेरै मतदाताले पारदर्शी नेतृत्व, स्थायित्व र दीर्घकालीन विकासप्रति भरोसा बढेको प्रतिक्रिया दिने गरेका छन्।
यस निर्वाचनमा नेपाली कांग्रेस, नेकपा, राष्ट्रिय स्वतन्त्र पार्टी र राष्ट्रिय प्रजातन्त्र पार्टीका उम्मेदवारहरू मैदानमा भए पनि एमाले उम्मेदवार पाण्डेप्रति युवापुस्ता, व्यवसायी वर्ग र विभिन्न समुदायको आकर्षण क्रमशः बढ्दै गएको देखिन्छ। स्थानीयस्तरमा भइरहेका अन्तरक्रिया र छलफलले प्रतिस्पर्धालाई थप रोचक बनाएको छ।
नेकपा एमालेले अघि सारेको सुशासन, समृद्धि र राष्ट्रिय विकासको एजेन्डालाई स्थानीय आवश्यकतासँग जोडेर प्रस्तुत गर्ने पाण्डेको अभियानले मतदातामाझ सकारात्मक सन्देश प्रवाह गरिरहेको छ। सक्रिय जनसम्पर्क, संगठित अभियान र बढ्दो समर्थनका आधारमा एमाले पक्षधरहरू पर्सा–३ मा नतिजा आफ्नो पक्षमा आउने आशामा देखिएका छन्।
