वीरगञ्ज। पर्सा जिल्लामा प्रतिनिधिसभा निर्वाचन नजिकिँदै गर्दा राजनीतिक गतिविधि तीव्र बन्दै गएको छ। यही क्रममा राष्ट्रिय स्वतन्त्र पार्टी (रास्वपा) का उम्मेदवार शुशिल साह कानुले वीरगञ्ज महानगरपालिका वडा नम्बर–१७ को अलौं क्षेत्रमा घरदैलो कार्यक्रम सम्पन्न गरेका छन्।
घरदैलो अभियानका क्रममा कानु टोल–टोलमा पुगेर स्थानीय बासिन्दासँग प्रत्यक्ष संवाद गर्दै आफ्नो चुनावी एजेन्डा प्रस्तुत गरे। उनले सुशासन, पारदर्शिता, भ्रष्टाचार नियन्त्रण र जनउत्तरदायी शासनलाई आफ्नो मुख्य प्राथमिकता बनाएको बताए। कार्यक्रममा उनले “राजनीति सेवा हो, सत्ता होइन” भन्ने मूल संदेश दोहोर्याउँदै नयाँ राजनीतिक विकल्पको अवसर दिनुपर्नेमा जोड दिए।
स्थानीय मतदाताहरूले रोजगारी सिर्जना, सडक तथा पूर्वाधार विकास, शिक्षा र स्वास्थ्य सेवा पहुँच जस्ता क्षेत्रीय समस्याहरू उठाएका थिए। कानुले योजनाबद्ध ढंगले यी क्षेत्रीय आवश्यकताहरू पूरा गर्ने प्रतिबद्धता जनाए। कार्यक्रममा उपस्थित रास्वपाका कार्यकर्ता र समर्थकहरूले ‘जय घण्टी’ नारासहित वातावरण उत्साहपूर्ण बनाएका थिए।
वीरगञ्ज र पर्सा जिल्लाभर चुनावी गतिविधि तीव्र हुने क्रममा, अलौंमा सम्पन्न रास्वपाको घरदैलोले स्थानीय राजनीतिक माहोललाई अझ सक्रिय बनाएको देखिन्छ। विभिन्न दलका उम्मेदवारहरूले घरदैलो, सभा र सम्मेलनमार्फत मतदातासँग प्रत्यक्ष सम्पर्क बढाइरहेका छन्।
