पर्सा निर्वाचन क्षेत्र नम्बर–३ मा हुने आगामी प्रतिनिधि सभा चुनाव अब सामान्य राजनीतिक प्रतिस्पर्धाको दायराभन्दा माथि उठ्दै निर्णायक संघर्षको चरणमा पुगेको छ। नेकपा एमालेले संगठनात्मक मजबुती, जनस्तरमा बढ्दो विश्वास र युवा नेतृत्वको प्रभावका कारण चुनावी मैदानमा स्पष्ट अग्रता बनाउँदै लगेको देखिएको छ।
यसै सन्दर्भमा नेकपा एमाले पर्सा जिल्ला कमिटीको आयोजनामा वीरगञ्ज महानगरपालिका वडा नम्बर–२४ स्थित पार्टी कार्यालयमा सम्पन्न निर्वाचन केन्द्रित छलफल तथा परिचयात्मक कार्यक्रमले क्षेत्रीय राजनीतिमा नयाँ ऊर्जा थपेको छ। कार्यक्रममा देखिएको कार्यकर्ता सक्रियता, अनुशासन र नेतृत्वको प्रत्यक्ष संलग्नताले पर्सा–३ को राजनीतिक माहोल एमालेको पक्षमा मोडिएको संकेत दिएको छ।
कार्यक्रमलाई सम्बोधन गर्दै प्रतिनिधि सभा सदस्यका युवा उम्मेदवार रूपेश कुमार पाण्डेले पार्टीभित्र एकता र प्रतिबद्धताका साथ चुनावी मैदानमा उत्रिन कार्यकर्तालाई आह्वान गर्नुभयो। उहाँले अब भाषण र आरोप–प्रत्यारोपको राजनीति समाप्त भएको उल्लेख गर्दै जनताले प्रत्यक्ष अनुभूति गर्ने विकास, सुशासन र विश्वासको राजनीति आवश्यक रहेको धारणा राख्नुभयो।
“जनताको पक्षमा निडर भएर उभिने नेतृत्व नै विजयी हुन्छ, अवसरका लागि राजनीति गर्नेहरू टिक्दैनन्,” भन्दै पाण्डेले कार्यकर्तामा आत्मविश्वास र जोश जगाउनुभयो।
छलफल कार्यक्रममा नेकपा एमालेका केन्द्रीय कमिटी सदस्य तथा पर्सा जिल्ला इन्चार्ज प्रभु हजरा, केन्द्रीय सदस्यहरू निर्मला देवकोटा र विजय सरावगी, मधेस प्रदेश उपाध्यक्ष विचारी यादव, जिल्ला कमिटी सचिव महेश दास, क्षेत्रीय कमिटी संयोजक मानदेव हजरालगायतको उल्लेखनीय उपस्थिति रहेको थियो। केन्द्रीय, प्रदेश र स्थानीय नेतृत्वको यस्तो सशक्त सहभागिताले पर्सा–३ मा एमालेको चुनावी रणनीति संगठित र आक्रामक बन्दै गएको स्पष्ट सन्देश दिएको छ।
कार्यक्रमका क्रममा निर्वाचन क्षेत्र–३ को समग्र राजनीतिक अवस्था, संगठनात्मक सन्तुलन र जनभावनाबारे विस्तृत समीक्षा गरिएको थियो। एमाले नेतृत्वको आन्तरिक विश्लेषण अनुसार युवा उम्मेदवार पाण्डेको स्पष्ट दृष्टिकोण, विकासप्रतिको प्रतिबद्धता र जनतामाझ बढ्दो लोकप्रियताका कारण विपक्षी दलहरू दबाबमा परेका छन्। विपक्षीहरूको चुनावी तयारी कमजोर देखिएको र जनसमर्थन क्रमशः एमालेतर्फ आकर्षित हुँदै गएको निष्कर्ष निकालिएको छ।
कार्यक्रमपश्चात् कार्यकर्तामा देखिएको उत्साह, संगठनात्मक एकता र अनुशासनले पर्सा–३ मा एमालेको विजय अब केवल अनुमानको विषय नभई समयको प्रश्न बनेको संकेत दिएको छ। चुनावी मैदानमा एमालेको सशक्त र निर्णायक उपस्थितिले पर्सा–३ को राजनीतिक समीकरण परिवर्तन गर्ने निश्चित देखिएको छ।
