सर्लाही-हालैको अविरल वर्षासँगै बलरा नगरपालिका विविध वार्डहरू गम्भीर रूपमा बाढीग्रस्त बनेका छन्। आज बिहान स्थानीय नेतृत्व टोलीले ती प्रभावित बस्तीतर्फ पुगेर जनधनको क्षतिको विस्तृत अबलोकन तथा प्रत्यक्ष स्थितिको जानकारी लिएको छ। बाढीका कारण धेरै परिवारहरू अस्थायी बासमा बस्न बाध्य भएका छन् भने खेती, पशुपालन र घरायसी सामग्रीमा समेत ठूलो क्षति भएको विवरण प्राप्त भएको छ।
निरीक्षण टोलीको नेतृत्व जिल्ला इन्चार्ज श्री चन यादवले गरेका थिए। उनीसँगै बलरा–११ का वार्ड अध्यक्ष सुखलाल सहनी, प्रतिनिधिसभा निर्वाचन क्षेत्र नं.–४ का प्रत्याशी राकेश मिश्र, नगर सचिव जितलाल यादवसहित अन्य स्थानीय जनप्रतिनिधि तथा कार्यकर्ताहरूको उपस्थिति उल्लेखनीय थियो। टोलीले खासगरी ती बस्तीमा ध्यान केन्द्रित गर्यो जहाँ घरहरू पानीले घेरेका छन्, बाटोघाटो अवरुद्ध छ र नागरिकहरू सुरक्षित स्थलतर्फ सर्न बाध्य बनेका छन्। विभिन्न परिवारसँग भेटघाट गरी उनीहरूको बसोबास अवस्था, खाधान्न संकट, स्वास्थ्य जोखिम तथा तत्काल चाहिने सहयोगबारे जानकारी लिइएको छ।
बालबालिका, वृद्धवृद्धा, गर्भवती महिला तथा अशक्त व्यक्तिहरू विशेष जोखिममा रहेको भन्दै स्थानीयले तत्काल उद्धार, अस्थायी आवास, औषधोपचार र दैनिक उपभोग्य सामग्री उपलब्ध गराउन आग्रह गरेका छन्। निरीक्षणका क्रममा चन यादवले राज्यका जिम्मेवार निकायसँग निरन्तर समन्वय गरी पीडितलाई राहत तथा पुनर्स्थापना सहज बनाउन पहल गरिने प्रतिबद्धता जनाए। उनले बाढीले प्रभावित क्षेत्रको तथ्यांक संकलन गरी क्षतिपूर्तिको प्रक्रिया अघि सार्नेदृष्टि राखिएको बताए।
प्रत्याशी राकेश मिश्रले बाढीग्रस्त नागरिकको पीडा गम्भीर विषय भएको भन्दै संघीय तथा प्रदेश तहमा समन्वय गर्दै तत्काल सहयोग जुटाउन आफू सक्रिय रहने उल्लेख गरे। नगर सचिव जितलाल यादवले नगरपालिका तहमा राहत कोष सञ्चालन, खानेपानी, सफाइ र अस्थायी बसोबासको प्रबन्धबारे छलफल अघि बढाइने जानकारी दिए। निरीक्षणपछि टोलीले राहत तथा उद्धार कार्य चाँडै अघि बढाउन स्थानीय प्रशासन, समाजसेवी संस्था र स्वयंसेवी युवाहरूसँग सामूहिक सहकार्य आवश्यक रहेको निष्कर्ष निकालेको छ।
