स्वास्थ्य कार्यालय पर्साका अधिकृत जयमोद ठाकुरद्वारा पत्रकारहरूमाथि गरिएको दुर्व्यवहारप्रति प्रेस सेन्टर पर्साले गम्भीर ध्यानाकर्षण भएको जनाएको छ। प्रेस सेन्टर पर्साले दोषीमाथि तत्काल कारबाही हुनुपर्ने माग गर्दै कारबाही नभए कडा संघर्षको चेतावनी समेत दिएको छ।
विगत दिन पर्सा स्वास्थ्य कार्यालयद्वारा आयोजना गरिएको तालिम कार्यक्रममा सहभागी भएका प्रेस सेन्टर पर्सा शाखाका कार्यसमिति सदस्य सन्तोषकुमार कुशवाहा, पत्रकारहरू आरोहणकुमार साह, राजु बैठा, राकेशकुमार साह, अर्जुन चौधरी र आनन्दकुमार पटेलमाथि स्वास्थ्य अधिकृत ठाकुरले अभद्र शब्द प्रयोग गर्दै गालीगलौज र दुर्व्यवहार गरेका थिए।
प्रेस सेन्टर पर्साले जारी गरेको विज्ञप्तिमा सो घटनालाई आपत्तिजनक भन्दै स्वास्थ्य अधिकृत ठाकुरलाई तत्काल कानुनी दायरामा ल्याउन माग गरिएको छ। साथै, पत्रकारमाथि भएको दुर्व्यवहारमा प्रहरी प्रशासनका जिल्लास्तरीय अधिकारीहरूले प्रभावकारी कदम चाल्न नसक्दा उनीहरूको भूमिकाप्रति शंका उत्पन्न भएको विज्ञप्तिमा उल्लेख छ।
प्रेस सेन्टर पर्साका सचिव अजित भुजेलद्वारा जारी विज्ञप्तिमा दोषीमाथि तत्काल कारबाही नभएमा संघर्षका कार्यक्रम घोषणा गर्न बाध्य हुने चेतावनी दिइएको छ।
