पर्सा जिल्लाको निर्वाचन क्षेत्र नम्बर–३ मा नेकपा एमालेले आगामी प्रतिनिधिसभा निर्वाचनलाई मध्यनजर गर्दै संगठन विस्तार, कार्यकर्ता व्यवस्थापन र जनआधारित अभियानलाई तीव्र बनाएको छ। यसै सन्दर्भमा पोखरीया स्थित पार्टी कार्यालयमा सम्पन्न क्षेत्रीय समन्वय कमिटीको बैठकले एमालेको चुनावी रणनीतिलाई थप स्पष्ट दिशा दिएको छ।
बैठकमा पार्टी संगठनलाई तल्लो तहसम्म मजबुत बनाउने, घरदैलो अभियानलाई व्यवस्थित गर्ने तथा जनताको विश्वास जित्ने कार्यक्रमलाई प्राथमिकतामा राख्ने विषयमा गम्भीर छलफल भएको थियो। विशेष गरी युवाको सहभागिता बढाउने र अनुभवी नेताहरूको सल्लाहलाई अभियानसँग जोड्ने रणनीतिमा जोड दिइएको थियो।
बैठकलाई सम्बोधन गर्दै प्रतिनिधिसभा सदस्यका युवा उम्मेदवार रूपेश कुमार पाण्डेले पर्सा–३ लाई विकास, सुशासन र रोजगारीको केन्द्र बनाउने स्पष्ट प्रतिबद्धता व्यक्त गर्नुभयो। उहाँले शिक्षा, स्वास्थ्य, सडक, खानेपानी र युवालाई स्वरोजगारतर्फ उन्मुख गराउने कार्यक्रमलाई प्राथमिकतामा राख्दै दीर्घकालीन विकास योजनासहित अघि बढ्ने धारणा राख्नुभयो। जनताको भरोसा र युवाको ऊर्जालाई आधार बनाएर समृद्ध पर्सा–३ निर्माण गर्ने उहाँको भनाइ थियो।
क्षेत्रीय समन्वय कमिटीका अध्यक्ष फर्मान मियाको अध्यक्षतामा सम्पन्न उक्त बैठकमा केन्द्रीय कमिटी सदस्य तथा पर्सा जिल्ला इन्चार्ज प्रभु हजरा प्रमुख अतिथिका रूपमा उपस्थित रहनुभएको थियो। कार्यक्रममा केन्द्रीय सदस्य निर्मला देवकोटा, केन्द्रीय सल्लाहकार परिषद सदस्य शिव पटेल, मधेश प्रदेश उपाध्यक्ष बिचारी यादव, जिल्ला अध्यक्ष विश्वम्भर शर्मा लगायत प्रदेश, जिल्ला र पालिका तहका नेताहरूको उल्लेखनीय सहभागिता रहेको थियो।
बैठककै अवसरमा विभिन्न राजनीतिक दल परित्याग गरी दुई दर्जनभन्दा बढी नेता तथा कार्यकर्ता एमालेमा प्रवेश गरेका छन्। नेपाली काँग्रेस निकट तरुण दल पर्साका सचिव संतोष महतो, राष्ट्रिय मुक्ति पार्टीका सदाम हुसैनसहित पोखरीया नगरपालिकाका विभिन्न वडाका सक्रिय कार्यकर्ताहरू एमालेमा समाहित भएका हुन्। नवप्रवेशीहरूलाई पार्टी नेतृत्वले खादा ओढाएर स्वागत गरेको थियो। साथै, संतोष महतोलाई क्षेत्रीय युवा परिचालन कमिटीको संयोजकको जिम्मेवारीसमेत दिइएको छ।
प्रमुख अतिथि हजराले पार्टी कार्यकर्तालाई एकताबद्ध, अनुशासित र जनमुखी ढंगले चुनावी अभियानमा लाग्न निर्देशन दिनुभयो। उहाँले पर्सा–३ मा देखिएको जनसमर्थन, संगठनात्मक तयारी र बढ्दो आकर्षणले एमालेको जित सुनिश्चित हुने विश्वास व्यक्त गर्नुभयो।
बैठकले पर्सा–३ मा एमालेको संगठन दिनप्रतिदिन सुदृढ बन्दै गएको स्पष्ट संकेत गरेको छ। युवाको अग्रसरता, अनुभवी नेताहरूको मार्गदर्शन र जनताको बढ्दो भरोसाका कारण रूपेश कुमार पाण्डेको उम्मेदवारीलाई परिवर्तन, विकास र स्थायित्वको प्रतीकका रूपमा हेरिन थालेको छ।
कार्यक्रममा पूर्व संविधानसभा सदस्य तथा पोखरीया नगरपालिकाका नगर प्रमुख प्रधुमन चौहानले स्वागत मन्तव्य व्यक्त गर्नुभएको थियो भने कार्यक्रमको सहजीकरण संतोष गिरीले गर्नुभएको थियो।
